შევეცდებით ავხსნათ, 40 წელს მიღწეული, წარმატებული და იღბლიანი მამაკაცები რატომ ყიდულობენ მინივენს დიდი ხნის ნანატრი, პრიალაზედაპირიანი და ტყავის სავარძლებიანი სუპერმანქანის ნაცვლად?

თუ თქვენი ცხოვრება მარტივად და მხიარულად მიედინება, ასაკიც უკვე კარგა ხანია გადასცდა ორმოცს, ვფიქრობთ, ბევრი რამ ვიცით თქვენზე: საყვარელი შვილები უცხოეთის პრესტიჟულ უნივერსიტეტებში სწავლობენ და იშვიათად ხვდებით, საყვარელი მეუღლე განებივრებულია და ყველაფერი აქვს, მათ შორის: ფეშენებელური სახლი, მანქანა, ძვირადღირებული კლუბებისა და სპა-სალონების აბონიმენტი და საყვარლებიც კი. სამწუხაროდ, მეუღლესაც დღეგამოშვებით ეკონტაქტებით. სწორედ ამ დროს ხვდებით, რომ სამაგალითო მოქალაქეობა და ერთი შეხედვით ბედნიერი ოჯახის თავობა მოგბეზრდათ. კრედიტები გადაფარული გაქვთ, ბიზნესი -აწყობილი, დროა მოტოციკლი შეიძინოთ! სისწრაფის აკრეფვა და გზების დაპყრობა – ერთი სიამოვნებაა. გოგონები, ტყავის ქურთუკი, თეთრი მაისური, გზისპირა ჰოტელი, ვისკი ან ლუდი ყველაფერია, რაც ახლა გინდათ.

დგება სანატრელი მომენტი, მაგრამ ოდნავ შეცვლილი სურათით – მოტოციკლის მაგივრად მინივენი გაქვთ. დიახ, მიდიხართ და მინივენს ყიდულობთ, იმიტომ რომ, მოტოციკლი – ბედნიერებაა, მაგრამ მინივენი სულ სხვაა. წარმოიდგინეთ, ახალი კატეგორიის მართვის მოწმობის აღებაც არ მოგიწევთ, ქვეყანაში კრიზისიც რომ დაიწყოს, ბიზნესი დაგეშალოთ – შეგეძლებათ უსაფრთხოდ მართოთ ავტობუსი, კორპორატიული საღამოებისა და სადღესასწაულო ვახშმების სტუმრები კომფორტული მგზავრობით უზრუნველყოთ. თუ ცხოვრებაში კიდევ უფრო არ გაგიმართლებთ და მეუღლე განქორწინებას მოითხოვს და სახლსაც მიისაკუთრებს, არ იდარდოთ, მინივენი ყველაფერ ამასაც ჩაგინაცვლებთ. რაც შეეხება გოგონებს… დარწმუნებულები ვართ ისინი მინივენში თავს გაცილებით კომფორტულად იგრძნობენ.

line